Klostertrio med julekonsertar
Klostertrio byr på levande musikk i ei litt uvanleg adventstid.
Gruppa skal framføra «Fagre juledag», ein konsert beståande av tradisjonelle, vakre julesongar. Konserten vert halden tre stader i Kvinnherad komande helg. I Åkra kyrkje fredag, i Kaldestad Bedehus på laurdag og Halsnøy Kloster på sjølvaste Luciadagen sundag 13. desember.
Artikkelen held fram under annonsen.
– Konserten varer i kring ein time. Me vil ta alle naudsynte omsyn til smittevern, difor vert det fleire konsertar, med relativt få publikummarar, melder Tore Kloster.
Han sjølv er songar frå Halsnøy, men med sterk tilknyting til Kaldestad. Med seg i Klostertrio har han også Solveig Sørheim frå Etne (trøorgel) og Irene Simonsen frå Stord (piano). Dei har teke namnet Klostertrio fordi dei frå søndag kan reknast som Halsnøy Kloster sitt eige musikkensemble.
Frå våren 2021 vil dei gje eigne konsertar; men også invitera andre musikarar og dessutan ha annan musikkfagleg aktivitet på Klosteret.
– Fokus vil vera på den lokale musikkulturen – som denne konserten representerer, men også den musikken som er tidstypisk for dei to tidsaldrane som er representert på Halsnøy Kloster: Våningshuset, som representerer den romantiske kunstperioden, og musikken, særleg songen, som må ha vore ein viktig del av klosterlivet på Halsnøy, i dei romma som i dag berre er ruiner, seier Tore Kloster.