Klart for trimfest på Husnes

Søndag går det årvisse Søralløpet av stabelen for 34. gong, i år med ny løypeprofil.

– Som følgje av at vegen langs elektrolysehallane er stengt på grunn av arbeid, så har vi gjort nokon endringar på løypa. Der ein tidlegare sprang langs elektrolysehallane og bort til portvakta, skal ein no bort mot Statoil og ta opp til høgre på stien ved golfbanen, seier nestleiar Are Ulseth i Søral B.I.L.

Vidare går det ei rundløype ved enden av golfbanen og ved Undarheim gard, før ein spring ned igjen same veg ein kom. Det betyr at årets løp er på vel seks kilometer, og med det 200 meter lenger enn dei føregåande åra. Noko som er med på å gjera det enno vanskelegare å slå løyperekordane til Terje Aggvin (18.04) og Kirsten Marathon Melkevik (20.12).

Løpet tjuvstartar torsdag då elevar frå skulane og barnehagane skal i aksjon i det tradisjonsrike skuleløpet.

– Vi ynskjer å takka dei frivillige pensjonistane som er med og bidreg som vakter. Dei er vi heilt avhengige av for å få gjennomført, seier Ulseth og legg til:

– Så får vi håpa at vi er heldige med vêret.