Matti Røssland er eit av trekkplastera på festivalplakaten til Omstock 2018. Han spelar opp i Festsalen fredag kveld. (Arkivfoto)

Klart for torgfest heile helga

Første helga i juni er det klart for den andre Omstock-festivalen i rekkja. Ein festival Trond Betten trur vil by på noko for kvar ein smak.

– Det viktigaste for oss er at det skal vera triveleg. Noko vi jo har klokketru på at det kjem til å bli. Hensikta vår er å laga ei helg som heile kommunen har lyst til å ta del i, og då ikkje berre med tanke på musikken på kvelden, men også alle aktivitetane som skjer på dagtid begge dagane, seier Trond Betten.

Artikkelen held fram under annonsen.

 

Lokalt innslag

Det vert arrangement og tilbod for både store og små frå tidleg føremiddag av både fredag og laurdag, der helikopterturar, bodar og tivoli står sentralt. Før det musikken brakar laus på dei tre forskjellege scenane litt ute på kvelden.

– Fredag er det Matti Røssland i Festsalen som er det største, men samstundes skal Eirik Søfteland spela på Peppes. I tillegg vert det konsertar på GryHelges, og målet vårt er at det skal vera mogleg å få med seg litt av alt, seier han.

Men sjølv om det er Røssland og Søfteland som står med størst skrift på festivalplakaten, vil Betten løfta fram eit lokalt innslag fredag.

– Det er Lasse Tuastad, ein utflytta kvinnhering som har med seg Gatas Evangelium. Eit band beståande av tidlegare rusmisbrukarar som syng om livet som har vert og livet som ventar. Det er ikkje berre bra musikk, det er også sterkt og veldig meiningsfullt, så det gler eg meg veldig til, seier Betten.

 

Flyttar ut

Artikkelen held fram under annonsen.

Laurdagen flyttar Omstock ut av Festsalen og riggar til med ein stor utescene på Torgplassen. Og det er på denne scena at Stavangerkameratane kjem til å avslutta årets festival.

– Men også den dagen vert det aktivitetar frå tidleg av. Målet vårt er at det skal trykka bra på frå tidleg føremiddag til langt på natt, og at det skal vera noko for alle, seier han.

Noko det så langt ser ut til å vera.

– Interessa har vore bra, og vi har stor tru på at det skal bli ei kjekk helg for mange og vi gler oss stort. Så bryr vi oss ikkje så mykje om vêret, for er det mykje folk så blir det kjekt. Og så har vi moglegheita til å trekka inn om det skulle bli dårleg vêr, seier Betten og legg til:

– Vi har tatt eit steg frå i fjor, og om det fungerer bra, kan vi lova at vi skal byggja vidare også i 2019. Då med eit band som vil trykka enno hardare på, sluttar han.