Laurdag er det igjen klart for fritidsmesse. (Arkivfoto)

Klart for fritidsmesse på Husnes

Laurdag vert Husnes sentrum omgjort til eit utstillingsvindauga for all den aktiviteten kommunen har å by på.

Messa startar med eit nysirkus i kinosalane, før ein kan gå ut og få informasjon om det laget eller den organisasjonen ein er interessert i å vita litt meir om.

Artikkelen held fram under annonsen.

– Det er stands både inne og ute denne føremiddagen. Det vil vera aktivitet og stands på heile huset og i kjellaren vil BUA og ungdomssenteret vera ope, skriv frivilligsentralen i ei pressemelding.

Fritidsmessa er ein dag der folk kan få informasjon, testa ulike apparat og møta nokon av dei som er folka bak aktiviteten.

– Undersøkingar etter tidlegare messer viser at blant publikum er mange som har funne ein ny aktivitet og fått informasjon om kva som skjer rundt i den langstrakte kommunen vår. Så me vil oppmoda folk om å ta turen til Husnes for å delta på messa laurdag. Og dersom det er nokon som er litt seint ute til påmelding av sitt lag, men som gjerne ville ha vist fram sin aktivitet så er det enno mogleg å få det til, står det i pressemeldinga.