KHK har meldt på damelag

Komande sesong vert det igjen seniorhandball i Husneshallen.

– Me fekk eit par ekstra spelarar som har sagt ja, og har eit par som er på kanskje. Så det enda opp med at me meldte på lag til hausten, seier sportsleg leiar Marte Lie Børve i Kvinnherad handballklubb.

Damelaget, som har vore nede for teljing i halvanna sesong no, husar per i dag eit dusin spelarar i tillegg til ein handfull som er under kategorien kanskje.

– Det er fem-seks som er litt usikker på skule og slikt som skjer til hausten. Men me har tolv som er sikre, så me startar opp med frivillige fysiske treningar allereie i sommar. Så startar vi med reine handballtreningar ein gong ute i august når skulane startar, seier Marte.

Med det er laget klare til dyst når sesongen vert kasta i gang ein gong i september. Det einaste uvisse no er keeperplassen.

– Me har mange utespelarar, men har litt skadeproblem på keeperplass. Så me håper at det kjem seg i løpet av sommaren, eventuelt at fleire melder si interesse, sluttar Marte.