Kastar i gang sesongen med handballdag for dei yngste

Marius Tveit Nissestad

Marius Tveit Nissestad

marius@grenda.no

Publisert: 14. september 2018, 11:30

Søndag møter damelaget til KHK Eidsvåg til seriestart i 6. divisjon. Før avkast vert det handballdag for kommunen sine 1.- og 2. klassingar.

– Det stemmer. Det var litt dårleg rekruttering i fjor i forhald til dei yngste handballspelarane. Vi ynskjer å satsa på dei, så i forbindelse med damekampen så vil vi ha ein open handballdag der dei yngste kan koma og testa ut om handball er noko for dei, seier Marte Lie Børve frå KHK.

Dagen startar med eit introduksjonskurs i handball, før det vert praksis i form av leik og moro etter pausen.

– Så får vi sjå kor mange som melder seg på, og kor mange grupper det blir aktuelt å melda på til den komande sesongen. Vi håper i alle fall at det vert mange, seier Marte.

 

Keeper på plass

Som inspirasjon vert handballdagen opna med sesongstart i 6. divisjon. Noko som òg er eit comeback for Kvinnherad handballklubb sitt damelag.

– Statusen no er at vi er klare. Vi har fått på plass Kristine Røyrvik som keeper, i tillegg har me hatt gode treningar den siste tida. Så vert det spanande å sjå korleis me ligg an i forhold til dei andre laga i serien. Men vi er i alle fall positive, seier Marte.

Før sesongstart har dei vore mellom 12 og 15 jenter på trening, der den største stamma i laget er jenter mellom 16 og 20 år.

– I tillegg så er ein god del av ringrevane framleis med. Så vi har ei god blanding med det beste frå begge verder, sluttar Marte.