Kan bli årets Vippslag

Rosendal sitt G16-lag er blant dei siste fem fotballaga i landet som skal konkurrera seg i mellom om å bli årets Vippslag.

Dei kjempar med det om å få ei uforgløymeleg oppleving under årets Norway Cup.

– Det er veldig kjekt at dei utmerkar seg på ein så god måte, og eg unner dei absolutt å gå heilt til topps i denne konkurransen. Det har dei verkeleg fortent, seier Romar Skeie Olsen som har vore trenar for laget frå dei var seks år gamle.

 

Det var også han som fekk den gledelege oppgåva med å fortelja gutane at dei no er Vestlandet sitt bidrag i den landsdekkande Vipps-konkurransen.

– Det vart full jubel og stor stas i bussen både til og frå kamp, seier Romar.

Noko som kanskje ikkje er så rart når ein tenkjer på kva gulrot som no heng veldig nære nasa på dei unge håpefulle. Årets Vippslag skal nemleg vartast skikkeleg opp under årets Norway Cup. Med eigen spelarbuss, cheerleaders, sikkerheitsvakter, eigen massør, VIP-område og mykje meir vil laget som går til topps få ein smakebit på livet som fotballproff.

 

Men fyrst skal det leggjast ned eit godt stykke arbeid i siste del av konkurransen. I det som skal bli ein TV 2 Sumo-sendt serie skal tre spelarar frå kvart attverande lag konkurrera i ei rekkje ikkje-fotballrelaterte øvingar i Bergen fyrstkomande helg. Og det laget som samlar flest poeng helga gjennom blir kåra til årets Vippslag. Og mannen som skal geleida dei gjennom neste helgs store konkurranser er ingen andre enn tidlegare Premier League-proff og no fotballekspert i TV 2, Brede Hangeland.

– Det er ein godt samansveisa og humørfylt gjeng. Og dei tre som blir plukka ut kjem til å gjera alt for å gå til topps. Så det skal bli utruleg spennande å sjå korleis det går, seier Romar Skeie Olsen.