Kammermusikkfestival med krigstema

Første verdskrigen er tema for årets kammermusikkfestival, som har tittelen «I skyggen av en krig (1914-1918)».

Mari Mehl

Mari Mehl

mari@grenda.no

4 august, 2018

Rosendal Kammermusikkfestival er grunnlagt av pianist Leif Ove Andsnes, og blir arrangert for tredje gang 9.-12. august.

– Første del av det 20. hundreåret var ein ekstraordinær periode i musikkhistoria, der det oppstod eit enormt mangfald av nye musikkstilar, sa Leif Ove Andsnes då han presenterte årets program.

I fire dagar skal Rosendal Kammermusikkfestival setja søkjeljoset på åra 1914-1918, og utforska ein gripande og mangslungen musikalsk arv – verk komponistane skreiv anten som ein reaksjon på, eller trass i, krigen som raste rundt dei.

På programmet står Stravinskij sitt verk «Suite frå historia om ein soldat», som vart urframført dei siste månadane av første verdskrig, og Ravel sitt verk «La Valse», som ofte vert sett på som ein metafor for situasjonen den europeiske sivilisasjonen var i etter krigen.

 

Bomber i siste sats

Publikum får også høyra Janacek si ekspresjonistiske fiolinsonate med ekko av bomber i siste sats; Vaughan Williams si post-romantiske og glade «Lark Ascending»; Ravel sin neoklassisistiske «Le Tombeau de Couperin», tileigna vener som døydde i kamp; og folketoneinspirasjonen hos den armenske komponisten Komitas, som vart arrestert av osmanske styresmakter i 1915 og deportert til ein fangeleir.

Andsnes får selskap på scenen av Matthias Goerne (baryton), Anna Prohaska (sopran), Kirill Gerstein, Bertrand Chamayou, Eric Schneider, Ingrid Andsnes (klaver), Henning Kraggerud, Akiko Suwanai, Johan Dalene (fiolin), Lars Anders Tomter (bratsj), Edgar Moreau (cello), Dover String Quartet, Andreas Ottensammer (klarinett), Guy Eshed (fløyte), Sivan Magen (harpe) og Tim Gibbs (kontrabass).

Ein heil konsert er via Debussy, som meir enn nokon annan bygde bru mellom det 19. og det 20. hundreåret. Då han døydde i 1918, var den tyske våroffensiven i gang.

– Paris var under angrep både frå lufta og frå bakkeartilleri, og Debussy sitt gravferdsfølgje snigla seg gjennom aude gater medan tyske styrkar bomba byen, heiter det i pressemeldinga.

Under instrumentalkonsertane blir det nesten berre musikk komponert under første verdskrig, men festivalen ønskjer også velkomen to songarar som presenterer eigne program – men tema er det same. Sopranen Anna Prohaska syng frå «Behind the Lines», der alle tekstane er dikt frå krigen. Matthias Goerne kjem tilbake til Rosendal for å framføra Schubert si «Winterreise» saman med Leif Ove Andsnes.

– Med det tek dei oss tilbake til komponisten som var tema for den første Rosendal-festivalen i 2016, heiter det i pressemeldinga.

 

Utstillingar

Som ein del av konseptet kuraterer professor Gunnar Danbolt ei todelt utstilling som tek for seg reaksjonar på første verdskrig i målarkunsten, og ei eiga utstilling med arbeid av Håkon Bleken (f. 1929). Bleken har teke opp eksistensielle spørsmål i kunsten sin, ofte aktualisert gjennom hendingar i samtida. Han var ein av dei første til å reflektera målerisk over Utøya-massakren, og han har ofte lete seg inspirera av litteratur og musikk i verka sine. Målet er at dei ulike utstillingane skal akkompagnera musikken som skal framførast, og det blir konsertintroduksjonar og føredrag med Astrid Kvalbein, Erling Sandmo, Gunnar Danbolt og John Pellowe.