Julefeiring i Møteplassen Aksen

Ingebjørg Eik

Ingebjørg Eik

ingebjorg@grenda.no

Publisert: 19. desember 2018, 14:00

Det er fleire som har meldt seg på julefeiringa på møteplassen Aksen.

– Eg har òg høyrt rundt om kring at det er fleire interesserte, så eg trur nok det vert endå  fleire som kjem til å melda seg på dei neste dagane, seier Veronica Thorsen frå Frivilligsentralen på telefon måndag føremiddag.

Veronica fortel at damene som står bak initiativet ikkje kan få understreka nok at dette er eit tilbod for absolutt alle som ynskjer å vera saman med nokon på julaftan. Wivian Markhus og Hilde Hokland har sjølv kjent på einsemd i juletida, og ynskte difor å bidra med ei felles julefeiring, med heimelaga tradisjonell julemat til alle som kjem.

Feiringa vert i stova på Møteplassen Aksen, og Wivian har tilbydd seg å henta om ein eventuelt har problem med å koma seg frå a til b. Påmelding skjer via Veronica på Frivilligsentralen, og ein får meir informasjon om tidspunkt og anna hos ho.

Møteplassen Aksen meldte frå under pressekonferansen 4. desember at det var behov for eit fjernsyn til lokalet deira. Dagen etterpå kom det overveldande mange telefonar frå folk som hadde fjernsyn å donera vekk.

–  Så fjernsynet er allereie på plass i stova, seier ei blid Veronica på telefon.