Johnny briljerte då Viking festa grepet

Slår Viking Kongsvinger heime i siste kamp, spelar Johnny Furdal i Eliteserien neste sesong.

Det vart klart etter at blåtrøyene til Bjarne Berntsen slo tabellnabo Mjøndalen 4-2 på Isachsen Stadion søndag ettermiddag. Ein kamp som hadde det meste.

For etter at dei brunkledde vertane gjekk til pause med 1-0, varta gjestane opp med festfotball i andre omgang. 1-0 vart til 1-2 ti minutt ut i andre omgang. Der 2-1-målet til Zymer Bytyqi var av den verkeleg vakre sorten. Ti minutt etter det igjen var det Johnny Furdal sin tur til å jubla. Servert på blank kasse av nemnte Bytyqi, styrte omvikdelingen kontrollert inn 3-1 til Viking frå bakre stolpe. Mjøndalen reduserte like etter, men klarte ikkje å hindra Even Østensen i å setja spikaren i kista ti minutt før fulltid. Då servert på elegant vis av ein Johnny Furdal i storform, som no står med 24 målpoeng på 28 kampar i Obos-ligaen.

Fyrstkomande søndag kjem Kongsvinger på besøk til Stavanger, vinn Viking den er dei klare for Eliteserien som vinnarar av Obos-ligaen. Men skulle dei rota det vekk, er både Mjøndalen og Aalesund klare til å gå forbi på tabellen. Dei ligg høvesvis berre eitt og to poeng bak blåtrøyene, så alt er duka for ein høgdramatisk finale på årets sesong.