Jazzverket inviterer til «Kammerjazz»
«Saksofonistar + Jazzverket = sant!». Det meiner Jazzverket som også i år inviterer til Kammerjazz i samband med Rosendal Kammermusikkfestival.
Artikkelen held fram under annonsen.
Konserten går av stabelen no på laurdag, tradisjonen tru på heimebane i Nerhuskjellaren.
– Etter svært hyggelege stunder med Christina Dahl og Nils Janson frå København og Oslo, har vi denne gongen henta inn Ole Jacob Hystad frå Stord for å bli med oss. Vi har spelt med han før, og gler oss stort til eit nytt møte, skriv Jazzverket i ei pressemelding.
Ole Jacob Hystad er kjent for dei fleste jazzinteresserte frå band som Bergen Big Band, Organ Jam og ikkje minst hans eige Ole Jacob Hystad Quartet. Han har òg prega mange konsertar og innspelingar som «frilansar» med sin leikne og spenstige spelestil.
– Russisk musikk og Dmitrij Sjostakovitsj pregar Rosendal denne helga, og vi heng oss sjølvsagt på med eit par russiske eksperiment, i tillegg til nye og gamle låtar frå vårt standard-repertoar, opplyser Jazzverket, som lokkar med sal av forfriskingar i «skykkjo» før og etter konserten.