Inviterer til open dag

Rosendalstunet er snart ferdig. Fredag 2. februar vert alle interesserte invitert inn på open dag.

Leiinga på Rosendalstunet har varsla brukarar og pårørande om at det vert flytting til nybygget måndag 5. februar. Det gjeld òg dei som mellombels har budd på Varaldsøy aldersheim og Ølve alderspensjonat.

– Vi håpar at det skal gå, og per i dag ser det slik ut. Det står att ein del detaljar og praktiske småting som må på plass for at ting skal kunna fungera når vi flyttar inn, opplyser einingsleiar Leif Kolbjørn Kongestøl.

I forkant av flyttinga, fredag 2. februar, vert det arrangert open dag for bygdefolk og alle interesserte som har lyst å sjå huset. Sjølv meiner Kongestøl at anlegget er blitt flott.

– Ja, bygget ser bra ut og entreprenørane har fått skryt for arbeidet som er gjort. Det er blitt eit heilskapleg anlegg med opparbeidd uteareal og fine avdelingar. Vi håpar at alt verkar som det skal når vi tek det i bruk, og alle er sjølvsagt veldig spente etter to år med mellombels drift, fortel han.