Inviterer til konsert

Håvard Sætrevik

Håvard Sætrevik

haavard@grenda.no

Publisert: 3. oktober 2020, 17:00

30. oktober inviterer Cantus Firmus til konsert i Kvinnherad kyrkje.

Gabriel Faurè sitt Requiem i D-moll, komponert mellom 1887 og 1890, står på programmet i Allehelgensdag-helga. Musikk og song er samla rundt dette.

Eva Megyesi er organist, Kari Eide og Alida Nesheim er med på fiolin. Rebekka Attramadal er dirigent. Kor og musikarar blir samla bak på galleriet i kyrkja under denne konserten.

– Det vil gjere at ein høyrer verket meir enn ein ser kor og musikarar, skriv koret i ei pressemelding i samband med konserten.

 

Allehelgensdag

Konserten startar med solostykke på orgel av Franz Liszt som heiter «Requiem aeternam». Det vil også bli ein introduksjon om Gabriel Faurè sitt Requiem.

– Requiem står i den kyrkjelege tradisjon for Messe for dei døde, med både alvor og håp. Søndagen er det Allehelgensdag-gudsteneste, også kalla Helgemesse. Der er alle som har følgt nokon av sine til grava sidan sist allehelgensdag særskilt invitert, melder koret.

Smittevernreglar gjer at alle besøkande til konserten blir skrivne opp. Ein kan bli skriven opp frå og med ein time før konserten, og namna vert lagra i to veker. Konserten er eit samarbeid mellom Cantus Firmus og Kvinnherad Sokneråd.