Hilde Hokland (t.h.) og Wivian Markhus er initiativtakarane bak julefeiringa i møteplassen Aksen, medan Esben Zimmer (t.v.) og Agnar Melkersen på vegner av Lions Club Kvinnherad støttar tiltaket med 5000 kroner. (Foto: Håvard Sætrevik)

Inviterer til julefeiring

Alle som har lyst er hjartans velkomne til ei felles julefeiring med tradisjonell julemat og sosialt samvære.

– Eg trur det er vanskeleg å innrømma at ein er einsam i jula, seier Wivian Markhus og understrek at dette er ein sosialt tilbod for absolutt alle uansett kva for ein bakgrunn ein måtte ha.

Artikkelen held fram under annonsen.

I samband med gåveaksjonen Frivilligsentralen arrangerer kvart år stakk Wivian og Hilde Hokland innom med førespurnad om dei kunne få stella i stand ein felles julemiddag for alle som ynskjer å vera i lag med nokon på julaftan. Dei to initiativrike damene vil servera enkel og tradisjonell julemat, og oppfordrar alle som har lyst om å melda seg på til Veronica Thorsen på Frivilligsentralen.

– Feiringa vil vera på møteplassen Aksen i ei julepynta stove, seier Veronica.

Ho fortel at gåvebehovet er ekstra stort i år, og det kjem stadig inn fleire gåveførespurnadar, gjerne matvarer.

 

Pengegåve frå Lions

Like etter at julefeiringa vart skrive i stein, ringde visepresident Esben Zimmer frå Lions Club Kvinnherad og kunne fortelja at dei ynskte å sponsa nokre kroner no i førjulstida.

– Bidraget på 5000 kroner kunne ikkje koma på eit betre tidspunkt, smiler Veronica.

President i Lions, Agnar Utvær Melkersen, seier at dei neste år kanskje kan bidra med meir enn pengar, og at dei gjerne ynskjer seg fleire medlemmar.

Artikkelen held fram under annonsen.

– Vi vonar at dette vert ein tradisjon seier Hilde, og ynskjer vidare samarbeid med både Frivilligsentralen og Lions Kvinnherad.

 

Tilbyr transport

Om nokon skulle ha problem med å koma seg til og frå så tilbyr Wivian å henta i eigen bil.

– Det skal i alle fall ikkje stå på transporten om nokon ynskjer å koma.

Arrangementet startar etter kyrkjetid ein gong, og ein vil få meir informasjon om feiringa ved påmelding. Om nokon har lyst å hjelpa til med julefeiringa kan ein òg sjølvsagt melda seg til Veroncia.

– Det er også ope for å ha ei lita samling før julaftan også, om nokon skulle ha behov for å kikka litt i lokala på førehand, seier Veronica.

Under fotoseansen inne i stova på Aksen skyt Janicke Eide inn at dei gjerne ynskjer seg ein TV til lokalet.

Artikkelen held fram under annonsen.

– Om nokon har mogelegheit til å donera ein TV, så tek vi gledeleg imot, smiler ho.