Inviterer til fritidsmesse

21. september vil Kvinnherad kommune nok eingong samla kommunen sine lag og organisasjonar til ei stor fritidsmesse i Husnes sentrum.

Etter ynskje frå publikum er messa lag til etter lunsj laurdag, ei messe som opnar på akrobatisk vis laurdag føremiddag.

– Det vert ei gratis familieframsyning i kinosalen der vi får besøk av eit nysirkus. Etter det går turen ut på torgplassen for å helsa på standane til dei ulike lag og organisasjonane, seier Veronica T. Thorsen.

Det er dei ulike einingane i Kvinnherad kommune som står som arrangør for fritidsmessa, som er bygd opp på same lest som tidlegare utgåver – der dei ulike laga står på stand for å visa fram kva dei har å tilby.

– Det er ein unik moglegheit for dei ulike lag og organisasjonane vi har her i kommunen til å visa fram kva dei held på med. Vi driv i desse dagar å sender ut invitasjonar, så er det litt utfordringar med kva lag vi har registrert hos oss. Så om det er nokon som ikkje får invitasjon, men som har lyst til å delta, så er det berre å ta kontakt, seier Thorsen.

Dei som deltek vert også utfordra til å leika med kreativiteten. For saman med ein fagjury skal nemleg publikum kåra den beste standen, og vinnaren stikk av med ein pengepremie på 5.000 kroner.

Etter messa er ferdig på ettermiddagen går turen inn i Festsalen for årets tilflyttarsamling.