Inviterer til førjulstid i skogen
Foreininga Turstiar Toftåsen Storemyr lagar til julestemning i skogen på søndag. Samstundes vert fyrste del av rundløypa rundt Storemyr offisielt opna.
Foreininga inviterer til det dei kallar «fakkelopplyst Klype med juletonar frå skogen».
Artikkelen held fram under annonsen.
«Slik markerer vi opninga av fyrste etappe av rundløypa rundt Storemyr. Turen startar frå den nye skogsvegen på Heiastølen ovom Sæbøvik. Her vert det levande lys, faklar, bålpannegløgg og peparkaker», skriv dei på Facebook.
Laget nyttar også høvet til å takka skuleklassar og turgåarar som har gjort fantastisk innsats med å bera plank inn til Klype. Materialane skal brukast til klopper på neste etappe.
«Trur dette blir ei fin førjulsstund, i eit spesielt koronaår», lokkar Turstiar Toftåsen Storemyr.
Dei som vil kan ta turen vidare opp til Åsatinget.
Open for alle
Turstiar Toftåsen Storemyr er ei foreining som er open for alle. Føremålet deira er å rydda, opparbeida og vedlikehalda turstiar og aktivitetsområde ved nettopp Toftåsen og Storemyr på Halsnøy. Tanken er å «halda fram det flotte arbeidet Leifen på Heio har stått for». Dei treng framleis medlemmer som kan vera med på til dømes stirydding, grøfting, bera grus, laga klopper, gapahuk, aktivitetsområde for unge, skaffa medlemmer, basar/lotteri, laga skilt med meir. I styret sit Haldor Herland, Audun Tvedten, Jan Petter Myhre, Svenn Erik Eide, Heidi Medhus og Yngve Bryn.