Inviterer til debatt på kvinnedagen

Marius Tveit Nissestad

Marius Tveit Nissestad

marius@grenda.no

Publisert: 4. mars 2020, 11:00

Initiativtakarane bak fjorårets 8. mars-arrangement gjentek suksessen, og inviterer til ein dag med informasjon og debatt rundt likestilt arbeidsliv på kvinnedagen.

– Det var 30 år sidan sist det var arrangert eit 8. mars-arrangement i Kvinnherad før vi gjorde det i fjor. No gjer vi det til ein tradisjon, og inviterer til eit nytt arrangement dette året, seier kvinnekontakt Irene Nielsen-Sjo i Kvinnherad Ap.

Saman med SV, Raudt, Fagforbundet Kvinnherad og Kvinnherad bibliotek set Kvinnherad Ap eit likestilt arbeidsliv på kartet når dei inviterer til sitt 8. mars-arrangement på kvinnedagen. Her vil blant anna leiar Runhild Kjeldaas i Kvinnherad SV ta dei frammøtte gjennom eit historisk tilbakeblikk rundt temaet.

– Det gamle kommuneforbundet er 100 år i år. Så vi ynskjer å laga eit historisk perspektiv på det, og sjå på kor viktig fagrørsla har vore for eit godt arbeidsliv i Norge. Ikkje eit likestilt, men godt arbeidsliv, seier Runhild.

 

Paneldebatt

I tillegg vert det kulturelle innslag, før dagen vert avslutta med ein paneldebatt.

– Her har vi fått med oss kommunedirektør Ragnhild Bjerkvik, fungerande ordførar Hilde Enstad, Line Haugland frå Kvinnherad LO og Gaute Lund frå SF. I tillegg er vi veldig glade som har fått redaktør i Kvinnheringen, Mona Grønningen, med som leiar av debatten. Det er kjekt at vi har fått med ein kvinneleg leiar til å styra ordet, seier Silje Hjelmeland Olsen frå SV, og legg til.

– Så håper vi at vi kan få ein interessant debatt der ikkje alle er einige, legg Silje til.

Den raude tråden er eit likestilt arbeidsliv, noko publikum kjem til å merka gjennom heile programmet.

– Både dei kulturelle innslaga som biblioteket står bak, debatten og føredraga vil ha ein tydeleg raud tråd, seier Nielsen-Sjo.