Inviterer lyttarane med heim til sunnhordlandsforfattarane

Dei åtte biblioteka i Sunnhordland er klare med sin nye podkast «Sunnbibpodden». Ein podcast der lyttarane får bli med heim til fleire av regionen sine lokale forfattarar.

«Heim til Sunnhordlandslitteraturen» er ein podkastserie på sju episodar laga av Sunnhordland sine åtte bibliotek og utvalde lokale forfattarar.

– Over 60 aktive forfattarar blir rekna som sunnhordlandsforfattarar. Vi ynskjer å skapa større merksemd om dei ulike forfattarrøystene vi har i regionen, seier prosjektleiar Camilla Ruhs ved Stord folkebibliotek i ei pressemelding.

I dei forskjellege episodane ynskjer podkastskaparane å gi lyttarane ein introduksjon til forfattarskapen og gje dei svar på spørsmål som; Kor hentar forfattarane inspirasjon og rekreasjon? Har staden i landskapet i Sunnhordland hatt noko å seia for forfattarskapen?

 

Hagebesøk til Totland

Atle Hansen er intervjua i seglbåten sin i Sævarhagsvikjo, og lyttarane får bli med inn i skrivarstovene til Einar Øklan og Agnes Ravatn i Valevåg, og ein får bli med på besøk til Anna R. Folkestad, Bjørn Sortland og Mats Rage. I tillegg har dei teke turen til Valen for å sjå kva Anders Totland putlar på med i hagen sin.

Totland-episoden ligg allereie ute på biblioteka sine eigne heimesider, Instagram og Facebook. Den ligg også ved neders i saken.

– Det har vore eit veldig kjekt prosjekt å jobba med, seier Kristine Thorkildsen ved Stord folkebibliotek. Ho har vore teknisk ansvarleg for prosjektet og har vore med på fleire av intervjua saman med Camilla Ruhs.

I tillegg er Susanne Fæhn frå Kvinnherad bibliotek, Ingrid Leithaug Mjanger frå Bømlo folkebibliotek og Framtida-redaktør Svein Olav B. Langåker ansvarlege for kvar sine episodar.

– Eg håpar dette berre er starten. Biblioteka har eit mål om å vera ein viktig arena for samtale og debatt i lokalsamfunna våre. Vi har mange arrangement og formidlingsaktivitetar. Med podkasten vår har vi fått ein ny kanal der vi kan nå endå fleire, seier Ruhs.