– Innsamling til Ukraina i Kvinnherad

Måndag 9. mars kjem THK-traileren til Kvinnherad!

På vårparten er det tradisjon med innsamling til Ukraina i bygdene her. Traileren har stopp i Rosendal, Uskedalen og Husnes.

I over eit år har vi samla inn sekker og utstyr på lageret i Uskedalen. Dette er eit tilbod for folk som ryddar, eller har ting dei vil gje til Ukraina, og som vil ha det ut av huset. Takk til Uskedal Trelastlager og seinare Kvinnherad Vekstbedrift, for lån av lokalet.

Alt som er på lageret, ca. 300 sekker, vert lasta på traileren 9. mars. Bilen vert fullasta i Haugesund, om vi ikkje greier å fylla den her( plass til 1200 sekker). Tysdag 17. mars går turen til Aust-Europa, med to sjåførar frå Kvinnherad. Destinasjon er denne gong byen Zhytomyr, fylkeshovudstad i Zhytomyr oblast.

Ukraina grensar til Russland i aust, Kviterussland i nord, Polen, Slovakia og Ungarn i vest, Romania, Moldova i sørvest, og til Svartehavet og Azovhavet i sør. Kiev er hovudstad og største by. Ukraina er det største landet i Europa etter Russland. Over 40 millionar innbyggjarar. (Wikipedia). Det er eit fantastisk land og ukrainarane er hyggelege og gjestfrie .Landet har store naturresursar og mange har det dei treng. Nokon har rikeleg. Men det er òg mange som verkeleg er fattige og det er dei vi prøver å hjelpa.

THK-stiftelsen har i år 25 års jubileum. Med 20 hjelpesendingar i året, tyder det 500 trailerlass á 90 kubikk. Traileren har køyrt 2.250.000 km. av frivillige sjåførar som har brukt 96.000 timar på dette. Fleire vidaregåande skular har samla inn mykje pengar til prosjekt for born og ungdom. Over 60 brukte ambulansar og fleire brannbilar er køyrt til landet. Dette er kjekt å vera med på, for ein får sjå gleda hos mottakarane, og ein ser at hjelpa kjem fram! Sjå annonse om tid og stad i avisene.

 

For THK-stiftelsen

Tormod Myklebust