Inngår sponsoravtale med Hydro Husnes
IL Trio Fotball har inngått ein treårig sponsoravtale med Hydro Husnes, der aluminiumprodusenten går inn som hovudsponsor for barneavdelinga og Rema 1000 Husnes Cup.
Det skriv IL Trio i ei pressemelding fredag morgon.
Artikkelen held fram under annonsen.
Ein avtale leiar i fotballgruppa, Kjell Magnar Eide er veldig nøgd med.
– Vi er veldig stolte og nøgde med at Hydro set slik pris på vårt arbeid at dei vil inngå ein avtale. Det gjeld mellom anna at det vert Hydro-logo på alle 300 draktene i barneavdelinga, seier Kjell Magnar.
Barneavdelinga består av spelarane som er mellom seks og tolv år gamle. Ei viktig gruppe for Hydro Husnes.
– Det er bevisst frå Hydro si side at dei vel å satsa på dei unge fotballspelarane i Trio. På den måten treff målgruppa dei ynskjer å retta si støtte til barna og unge, seier Kjell Magnar.
Kvalitetsklubb
I pressemeldinga står det at både Trio Fotball og Hydro er i medvind om dagen.
– Det blir mange nye tilsette på Hydro som gjer at det vert fleire barn og unge som har behov for eit trygt og godt fritidstilbod. Hydro ser spesielt positivt på arbeidet Trio gjer med å bli kvalitetsklubb inneverande år, noko som betyr at fotballgruppa skal tilfredsstilla NFF sine krav til rutinar, organisasjon og kompetanse for utvikling av sunn barne- og ungdomsidrett, står det å lesa i pressemeldinga.