Hydroeffekten drypp på Kvinnherad Vekstbedrift

Freelands Grenda

Grenda

post@grenda.no

Publisert: 15. mars 2019, 12:00

Aktiviteten ved Hydro Husnes har sørga for at Kvinnherad Vekstbedrift har dobla vasketenestene.

Kvinnherad Vekstbedrift har avtale med Stord Innkvartering om vask og levering av sengkle, handkle og matter til brakkeriggen på Bogsnes. Dette fører til dobling av produksjonen og innkjøp av ny vaskemaskin med ein kapasitet på 500 kg turre kle. Kontrakten gjeld for to år i denne omgang.

Uskedalen.no har før skrive om Uskedal Trelastlager og levering av materiale til understellet på brakkeriggen. No gjeld det Kvinnherad Vekstbedrift og ein kontrakt som gjer at vaskeriet vert bygd om og nytt utstyr vert kjøpt inn. Ny vaskemaskin er venta inn i denne veka, vel 2 meter høg og 1,60 meter brei. Maskinen har stor trommel og har kapasitet til også å ta golvmatter.

Om lag 90 personar vil på denne måten få sine sengkle ( pute, dyne og laken ) og handkle frå Uskedalen. Det er henting og levering av varer kvar tysdag. I tillegg kjem vask av arbeidskle.

Arbeidsleiar på Vaskeriet, Eli Ersland, fortel at Kvinnherad Vekstbedrift utfører alle former for vask av klede. Verksemda har til dømes vask av arbeidskle for verksemder som HMR, Selstad, Hydro, BKS, Slangeservice og Norsafe. Nokre kundar hentar og bringar sjølve. Tysdagen er fast leveringsdag i veka. Vaskeriet har også moppevask for lag og organisasjonar, til no 6 organisasjonar.

Den nye bilen, som Uskedalen.no har skrive om før, forenklar all levering og henting av varer. Lift og bruk av vogner fører til ein langt meir effektiv transport.

 

Tekst/foto: Kristian Bringedal, Uskedalen.no