Hydro Husnes opnar B-hallen
Meldinga heile Kvinnherad har venta på i årvis kom torsdag morgon: Hydro Husnes skal gjenopna produksjonen i B-hallen frå sommaren 2020
- Hydro Husnes har avgjort at ein skal starta opp produksjonen. Det må gjerast ein del investeringaer, mellom anna på straumsida. Me reknar med å vera klare til å starta opp produksjonen i hallen til sommaren 2020, fortel kommunikasjonsdirektør i Hydro, Halvor Molland i ei pressemelding.
Det er venta at oppstarten av den hallen som har vore stengt sidan 2009 vil bidra til å skapa 90 nye arbeidsplassar.
Artikkelen held fram under annonsen.
– Vi har tru på framleis aluminiumproduksjon i Norge. Vi legg til ny teknologielement i denne oppstarten, og med det bygger vi eit robust og framtidsretta verk på Husnes. For Husnes betyr dette auka lønsemd, lågare energiforbruk og fleire arbeidsplassar, seier konserndirektør og leiar for primærmetall i Hydro, Hilde Merete Aasheim i pressmeldinga.
Slik det er i dag produserer verket rundt 95.000 tonn primæraluminium på årsbasis. Med gjenopninga vil Hydro Husnes produsera rundt 190.000 tonn i aluminium i året.
Hydro forventar at investeringskostnadane for oppgradering og oppstart vil koma på 1,3 milliardar kroner.