Hungry John på Snikkeriet
Fredag spelar bandet Jazzmin på Snikkeriet i Rosendal. Og laurdag kveld står den legendariske bluesartisten Hungry John på scena same stad.
– Hungry John er tilbake på Snikkeriet etter stor suksess i fjor, jublar arrangør Eli Kvalvågnes.
John Magnar Bernes, betre kjent som «Hungry John», har via livet sitt til blues. Heilt sidan midten av 60-talet har han reist rundt og opptredd i Norge og utanlands.
Artikkelen held fram under annonsen.
– Han er ein av pilarane på den norske musikkscena, og ein respektert veteran med ein livslang lidenskap for bluesen, heiter det i ei pressemelding.
The Hungry John Band består av John Magnar Bernes (vokal/munnspel), Atle Johannessen (gitar), Aksel Fjæra (bass/vokal) og Gunnar Bergstrøm (trommer).
Jazzmin er ei Bergensbasert gruppe, og musikarane har alle lang fartstid frå ulike musikkstilar; jazz, klassisk, pop og storbandmusikk. Sekstetten blei danna i 2008.
– Repertoaret vert plukka frå øvste hylle i jazzkatalogen, med eit spenn frå 1930 til 1990-talet, og med enkelte innslag også frå populærmusikk-/funk-/fusion-scena. Det meste av musikken er dansbar, lovar Snikkeriet i ei pressemelding.