Hit for hit står for opninga av årets Festidalen. (Pressefoto)

Humor-duo opnar Festidalen

Festidalen sparkar i gang helga med humorduoen frå TV-programmet Hit for hit.

Komikarduoen Jakob Schøyen Andersen og Fridtjof Stensæth Josefsen gjorde i fjor stor suksess gjennom TV-ruta med NRK-programmet Hit for hit, der dei parodierer store delar av musikknorge. Sidan då har duoen teke steget frå studio til live-scena, og har turnert landet rundt med utselte hus.

Artikkelen held fram under annonsen.

No skal dei også stå for opninga av Festidalen 2019.

– Hit for hit er ein humoristisk møkaspreiar som skapar pinleg lukt og gir eit saftig vekstgrunnlag for eit forlenga liv. Dette stinkar latterkrampe og mageknip, seier Daidalos Dahle i ei pressemelding.

Med det brakar årets festival laus på ein litt annan lest enn det han har gjort tidlegare. Utan at det uroar bookingsjefen.

– Det er ein ny, frisk og artig tanke å byrja festen på denne måten. Kvinnheringar er eit humoristisk folkeslag. Løgnare enn alle andre. Me likar å le og me nyt særleg å le saman. Og me elskar å gjera det i festleg lag, seier Daidalos.