Highasakite til Festidalen

Marius Tveit Nissestad

Marius Tveit Nissestad

marius@grenda.no

Publisert: 29. november 2018, 20:00

Fyrste namn på Festidalen-plakaten 2019 er den norske indiepop-gruppa Highasakite.

– For ein god vestlending er dette både smurde lefser og smalahove på same fat. Søt og mjuk kvalitet få meistrar, kombinert med eit frekt, tannflerrande glis du berre må stikka gaffelen i, seier bookingsjef Daidalos Dahle i ei pressemelding.

 

Kjem tilbake

Sidan bandet stod på Festidalen-scena i 2012, har dei verkeleg slått seg opp på den norske musikkhimmelen, og har turnert i både inn- og utland med sine tonar.

– Livets underlege koreografi trekk altså festidalenpublikummet ut i ein ny dans med Highasakite. I 2012 var det i nysgjerrigheita og nyforelskensen sitt namn. Denne gong er det reine bryllaupsvalsen. I mellomtida har bandet reist i livet. Vakse brutalt. Løfta seg til svimlande høgder. Då er det sjølvsagt på høg tid at dei svevar vår veg. Denne natta kjem ingen til å gløyma, står det å lesa i pressemeldinga frå Festidalen.

 

Nytt album

Etter debutalbumet «All That Floats Will Rain» i 2012, kjem Highasakite i februar 2019 med sitt fjerde album i rekkja. På den tida har dei levert hitar som «Golden Ticket», «Lover, Where Do You Live?» og «Samurai Swords».

– Med Highasakite har me starta med eit høgt og klart lokkerop. La oss samlast som tannlause babyar og sutta på kulturens deilege fellespattar. Dette bandet gir all naudsynt næring, seier Daidalos i pressemeldinga og minnar samstundes på at Festidalen legg billettar ut for sal no på fredag.