Klokka Per Magne Solberg har arva er eit slektstre å rekna, i tillegg til å vera eit hjørneskap, med utskorne portrett plasserte på klokkeskiva. Bestefaren, grantanter og grandonklar er plasserte på urskiva.

Her byrjar Barne-TV klokka Ragnvald

Klokka Per Magne Solberg har arva er som eit lite slektstre å rekna, med søskenflokken til bestefaren som dei tolv klokkesletta og oldeforeldra som klokkependel.

– Bestefar var gal etter klokker. Han skulle vore urolog, fleipar Per Magne, sjølvsagt vel vitande om at urolog aldeles ikkje har noko med klokker å gjera.

Artikkelen held fram under annonsen.

 

Klokker på hjernen

Det var bestefaren Ragnvald som var arkitekten bak klokka, som eigentleg er eit hjørneskap, og som no står på Ænes.

– Han dreiv møbelfabrikk på Lonevåg på Osterøy. Den brann ned i 1941, og han bygde opp ein ny på Arnatveit. Der vart det både møbel- og bussfabrikk. Så han leigde ein treskjerar han ofte brukte på fabrikken til å skjera ut portretta av dei tolv, forklarer Per Magne Medan han studerer kinderegget som kombinerer hjørneskap, slektstre og klokke.

Det må ha passa den klokkegalne farfaren til Ragnvald at dei var 12 i søskenflokken. Portretta er rangert frå eldst til yngst, med det som blir grandonkel Johan som klokka eitt. Ragnvald er strategisk plassert i barne-tv-tid, klokka seks. Foreldra til «urologen» pendlar rytmisk i pardans frå side til side under urskiva.

– Han hadde klokker på hjernen, og det var favorittgåva hans å gje. Så det var alltid klokker til konfirmasjonar og bursdagar, kommenterer Ænes-buen.

Bestefar Ragnvald var nummer seks i søskenflokken på 12, og er plassert deretter.

Frå Arna til Ænes

Den utflytta arnabuen deler etternamn med statsministeren, men slektskap skal det ikkje vera mellom dei.

– Men Erna har sagt ved fleire høve sagt at ho hadde somrar her på Ænes. Hennar far kjøpte bussar til Bergen Sporveier av bussfabrikken som far min då dreiv, og dei skal ha vore på vitjing her ved fleire høve, men me er ikkje i slekt.

Klokka har funne vegen frå møbelfabrikken i Arna til huset på Ænes via Liv, mor til Per Magne. Ho er oppvaksen på Ænes, men gifta seg inn i møbel- og bussfabrikkfamilien på Arna. Somrane vart nytta på barndomsplassen hennar, noko som igjen knytte Per Magne tett til bygda. Saman med kona Nina flytta han til Ænes i 1977, og har der budd sidan.

Artikkelen held fram under annonsen.

– Klokka kom hit for ti år sida. Mor flytta frå Arna og til Rosendal då, og klokka vart sett her medan mor venta på at huset i Goto skulle bli ferdig. Det har blitt ståande her sidan då, og ho går enno, smiler han.

Oldeforeldra Rasmus og Anna er utskorne på klokkependelen.