Henta heim NM-medaljar

Atle Helland og Terje Haugen kom begge heim til Kvinnherad med edle medaljar etter helgas NM i bogeskyting 3D i Røros.

Marius Tveit Nissestad

Marius Tveit Nissestad

marius@grenda.no

8 september, 2017

– Det er vel kanskje noko av det beste eg har levert i bogeskyting, så eg er veldig godt nøgd med sølvet, seier Atle Helland.

Han konkurrerte mot 26 skyttarar i hovudklassen, compound. Helland låg som nummer fem etter innleiingsskytinga laurdag, og skulle med det gjera opp om medaljane mot dei åtte beste søndag morgon.

– Eg skaut meg opp til sølvplass. Og dei tre som vart nummer ein, tre og fire skal faktisk til EM neste helg. Så det var kjekt å gje dei litt kamp og sjå at ein gamal valebu kan splitta dei beste, seier Atle.

 

Opprykk

Terje Haugen frå Husnes deltok i bogejeger-klassen, ein klasse han i fjor tok sølv i. Og etter berre to års trening kunne han no ta steget øvst på pallen.

– Eg er sjølvsagt veldig nøgd. Dette har eg jobba hardt for i det siste, med trening nesten kvar dag fram mot NM, så då er det veldig godt å få betalt, seier Haugen.

Han tek treninga veldig seriøst, og er alltid på jakt etter å bli betre. Og etter sølv og gull i bogejeger-klassen, ser han for seg eit opprykk neste år.

– Ja, då vil eg nok prøva meg i compound-klassen, så det blir eit lite opprykk. Elles så ser eg fram til krystallstemnet i Stavanger i februar. Der vert det innandørsskyting på blink, sluttar Haugen.