Held ølkranane stengte, men opnar opp for besøk

Regjeringa vidarefører dei nasjonale tiltaka, men med enkelte justeringar. Blant anna vert det igjen mogleg å ta i mot besøk.

I all hovudsak vidarefører regjeringa dei strenge smitteverntiltaka som vart innført 4. januar, men dei mjukar no meir opp for barn og unge. Blant anna i form av at det nasjonale tiltaksnivået for skular vert justert ned frå raudt nivå til gult. I tillegg gir dei igjen grønt lys for lokale idretts- og fritidsaktivitetar for barn og unge.

– Sjølv om tiltaka ser ut til å virka, og smittetala har gått noko ned, er situasjonen framleis usikker. Vi ser korleis smitten slår inn over landa rundt oss og forårsakar sjukdom og død. Det vil vi prøva å unngå i Norge. Difor vidarefører vi strenge tiltak og ein av dei aller strengaste grensekontrollane i Europa, seier statsminister Erna Solberg i ei pressemelding.

 

Fem på besøk

Smittesituasjonen er framleis usikker, og det er førebels ikkje mogleg for FHI og Helsedirektoratet å vurdera kor stor effekt tiltaka frå 4. januar har hatt. Likevel går regjeringa for å mjuka opp litt i dei strengaste nasjonale tiltaka.

– Tilrådinga om å unngå besøk heime vert ikkje vidareført. Det betyr at vi igjen kan ha inntil fem gjester i tillegg til dei som allereie bur saman. Men alle bør framleis avgrensa sosial kontakt, skriv regjeringa.

Når det kjem til trening og fritidsaktivitetar for barn og unge, fjernar regjeringa forbodet. Barn og unge under 20 år kan trena og delta på fritidsaktivitetar som normalt, både ute og inne. Det kan også gjerast unntak frå tilrådinga om ein meters avstand når det er nødvendig for å driva med aktiviteten.

– Vi har heile tida sagt at vi skal prioritera barn og unge når smittesituasjonen gjer det mogleg. Difor har vi bestemt at det nasjonale tiltaksnivået for ungdomsskular og vidaregåande vert justert ned til gult nivå, og at lokale treningar og fritidsaktivitetar for barn og unge vert opna opp. Vi veit kor viktig desse arenaene er for dei. Vi opnar også for besøk heime igjen, men ber folk avgrensa talet menneske dei møter, seier Solberg.

 

Skjenkeforbod

Forbodet mot skjenking av alkohol på serveringsstadar og arrangement vert vidareført inntil vidare. Det til tross for at FHI har anbefalt å fjerna forbodet.

– Regjeringa er einig med Helsedirektoratet og vidarefører nasjonal skjenkestopp inntil vidare. Det vil bli tatt ei ny vurdering i neste veke. Vi veit at tilsette i serveringsbransjen er overrepresentert når det kjem til koronasmitte. Ei dansk ekspertgruppa la nyleg fram ein rapport som viser at barar er blant dei områda som har høgast verknad på smittespreiinga, seier helse- og omsorgsminister Bent Høie.

Dei nye tiltaka varer så lenge det er behov for dei, men regjeringa vil vurdera situasjonen fortløpande. Skjenkeforbodet vert vurdert på nytt allereie neste veke, står det å lesa i pressemeldinga.

 

Dette er dei nye tiltaka:

Barnehage og skule:

- Nasjonalt tiltaksnivå for ungdomsskular og vidaregåande vert justert frå raudt til gult nivå. Kommunar kan oppretthalda raudt nivå ut denne veka dersom dei har behov for å førebu overgang til gult nivå. Kommunar med høgt smittepress bør vurdera å behalda raudt nivå i ungdomsskular og på vidaregåande, og ved behov vurdera raudt nivå også i barnehagar og barneskular.

 

Anbefalingar for alle i heile landet:

Sosial kontakt:

- Alle bør avgrensa sosial kontakt i størst mogleg grad. Det vert oppmoda til å møta andre utadørs, og ikkje ha besøk av fleire enn fem gjester i tillegg til dei som allereie bur saman. Dersom alle gjestene kjem frå same husstand, kan ein ha fleire, men ein må likevel ikkje vera fleire enn at ein kan halda avstand. Barn i barnehage og på barneskulen kan ha besøk frå eigen kohort.

 

Reiser:

- Ikkje gjennomfør reiser i inn- og utland, med mindre det er nødvendig. Reiser til studiestad kan framleis reknast som ei nødvendig reise, medan reiser for å delta på arrangement i utgangspunktet ikkje kan sjåast på som ei nødvendig reise. Hytteopphald i Norge med folk du bur saman med vert ikkje fråråda, innanfor dei lokale og nasjonale råda og regla som gjeld.

 

Høgare utdanning:

- Alle universitet, høgskular og fagskular bør bruka digital undervisning der dette er mogleg. Alle planlagde arrangement bør vera digitale, og større førelesningar og arrangement bør unngås. Studentar i område utan høg smitte bør få moglegheit til fysisk undervisning minst ein gong i veka når det er mogleg å gjennomføra i mindre grupper i tråd med smittevernrettleiaren.

 

Idretts-, fritids-, kultur- og livssynsarrangement:

- Barn og unge under 20 år kan trena og delta på fritidsaktivitetar som normalt, både ute og inne. Dei kan også unntas frå anbefalinga om ein meters avstand når det er nødvendig for å driva med aktiviteten. For barn og unge kan ordinær treningsaktivitet internt i klubbar, lag og foreiningar difor gjennomførast, men kampar, cupar, stemner med meir må framleis utsetjast.

- For vaksne vert det vidareført anbefalingar om ikkje å driva organisert aktivitet innandørs. Utandørs kan vaksne trena dersom det er mogleg å halda god avstand.

- Toppidretten vert anbefalt å utsetta alt seriespel i to veker. Norges idrettsforbund bes om å koordinera dette med særforbunda.

- Kulturarrangement som førestillingar, oppvisingar og liknande, samt kurs og konferanse og trus- og livssynsseremoniar vert utsett dersom desse samlar personar frå fleire kommunar. Folk bes om å respektera avgrensingar som arrangøren informerer om når det vert gjennomført arrangement førehalde innbyggjarar i ein enkelt kommune. Dette omfattar arrangement både utandørs og innandørs, men ikkje gravferder.

 

Arbeidsplassar:

- Heimekontor vert anbefalt for alle som har moglegheit til dette.

 

Reglar for heile landet:

Private arrangement og tilstellingar:

Dei fleste private arrangement bør utsetjast eller avlysast. Om dei likevel må arrangerast gjeld følgande reglar:

- Maksimalt ti personar på private tilstellingar utanfor eige heim, som for eksempel ein bursdag i leigd lokale. Dersom den private tilstellinga er utandørs er grensa 20 personar.

- Maksimalt ti personar på innandørs idrettsarrangement, kulturarrangement, seminar, livssynssamlingar, seremoniar med mei. Likevel 200 personar kor alle i publikum sit i fastmonterte seter. I gravferder kan det vera opp mot 50 personar, sjølv utan fastmonterte seter.

- Helsedirektoratet vil få i oppdrag å vurdera om kravet til fastmonterte seter for å ha inntil 200 eller 600 deltakrar på arrangement, bør erstattast med andre krav, for eksempel krav til tilviste faste sitteplassar.

 

Uteliv og serveringsstadar:

- Forbod mot skjenking av alkohol på serveringsstadar vidareførast inntil vidare. Det blir ny vurdering i veke fire, altså neste veke.