Held framleis rekordtempo

Håvard Sætrevik

Håvard Sætrevik

haavard@grenda.no

Publisert: 22. mai 2020, 00:07

Klokka 23 var over 38 mil tilbakelagt rundt og rundt i Omvikdalen. Snittfarten ligg framleis godt over gjeldande norgesrekord.

Om dei hadde vore på landevegen, hadde Kjetil og Vidar Mehl no vore om lag i Oslo. Før midnatt er 400 kilometersmerket passert, og norgesrekorden på 740 km i løpet av 24 timar er innan rekkevidde. Samstundes er det slik at den tyngste delen av maratonen står att, inkludert nattemørket som gjer det vanskeleg å halda farten like høg.
Det er likevel ikkje tvil om at tiltaket til inntekt for kreftforeininga og slagforeininga har fått folk til å opna lommebøkene. I skrivande stund er 95.000 donert til saka, i tillegg til alle dei gåvene som kjem når den totale lengda til brørne blir klar.

Branntroppen i Rosendal, som Kjetil Mehl er ein del av, tok turen for å gje moralsk støtte på kvelden.

 

Mange har vore oppom tunet til Kjetil Mehl for å visa si støtte, inkludert branntroppen i Rosendal, som Kjetil Mehl er ein del av.
Brørne har også fått støtte av ryttarar i sykkelklubben med fleire, som har vore med som hjelperyttarar gjennom dagen og kvelden, og vore med på å halda snittfarten høg.
Uavhengig av utfall og totallengd, det er verkeleg ei bragd Kjetil og Vidar er i gang med.

Den innsamla summen kan ein fortløpande sjå på bidra.no.

Ein kan også følgja med på kor langt Vidar Mehl har sykla på denne lenka.

Vidar Mehl fremst og Kjetil Mehl barkerst er i skrivande stund halvveg i 24 timarsrittet.