Heidrar sin avdøde venn med veldedigheitsstream

Marius Tveit Nissestad

Marius Tveit Nissestad

marius@grenda.no

Publisert: 25. mars 2020, 17:48

I år er det fem år sidan Peter Myhre frå Valen måtte gje tapt mot kreften. Det markerer fire av hans nære venar med ei kreativ innsamling til inntekt for kreftforeininga.

Tysdag kveld starta kameratfirlingen Viljar Dale Arnesen, Nikolai Rørdal, Mats Robin Helland og Mats Blokhus Ekeland opp ein veldedigheitsstream på streamingsida Twitch.com. Det for å minna sin avdøde ven Peter Myhre.

– Det er no fem år sidan Peter døde. Vi var alle saman veldig nære han, og sidan det no er fem år sidan så tenkte vi at vi måtte gjera noko spesielt for å markera dette, seier Viljar og legg til:

– Peter var ein person som elska å spela dataspel og som elska å bli utfordra. Han kom ofte med utsegn som «kva får eg visst eg eter denne her» eller «kva får eg visst eg gjer dette». Så då tenkte vi å køyra ei innsamling i hans and.

 

Peter Myhre frå Valen måtte gje tapt mot kreften for fem år sidan. No blir han heidra med ein kreativ innsamlingsaksjon av fire vener. (Arkivfoto)

– Har teke heilt av

Dei sette seg difor ned for tre månadar sidan for å planleggja kva dei skulle finna på. Svaret vart ein innsamlingsaksjon kombinert med ei direktesending der kameratane både spelar, mimrar og gjennomfører utfordringar mot pengegåver.

– Vi sette oss eit umogleg mål om å samla inn 10.000 kroner, noko vi tenkte at vi aldri kom til å koma i nærleiken av. Men då vi skrudde av streamen i går kveld klokka 22 var vi allereie bikka 5.000 kroner. Og då vi stod opp var det over 7.000. Så det har tatt heilt av, noko som både er utruleg overraskande og veldig kjekt, seier Viljar.

 

Rosa hår, chilli og kanel

Sett vekk i frå fredag, skal kameratgjengen streama kvar kveld fram til søndag. Her blir det hovudsakeleg ein god del speling, berre avkorta av artige utfordringar. Kor sprø greier dei må gjennom er heilt avhengig av kor mykje pengar som kjem inn frå publikum.

– Vi har allereie gjennomført ei kanel-utfordring, vi har kledd oss ut og spelt med grytevottar. I tillegg har eg farga skjegget mitt rosa, ler Viljar.

– Så ser eg allereie no at vi må eta ein sterk saus som eg har kjøpt inn. Den har 500.000 grader på scovilleskalaen, så det kan bli artig. I tillegg så vil det nok bli voksing av leggar og farging av hår.

Held utviklinga fram må nok dei spele- og utfordringsglade gutane oppgradera både innsamlingsmål og skalaen på utfordringane. Er dette noko du har lyst til å få med deg så kan du gå inn på Twitch og følgja Theviljar eller h3llduck.

– Inne på sidene våre ligg også sendeskjema på kva tid vi går på. Så det er berre til å koma og sjå på oss. Men du treng ikkje det om du ikkje vil, det er òg mogleg å berre gi gåve. Vi set pris på alle summar som kjem inn, om det er ti kroner eller hundre, har ikkje noko å seia. Vi er takksame for alt, sluttar Viljar.

Viljar Dale Arnesen har måtta farga skjegget rosa som følgje av alle bidraga til innsamlingsaksjonen. Skjermdump: Twitch.com.