Har du sett denne mannen?

Politiet og den amerikanske ambassaden ber om tips etter at ein amerikansk turist ikkje har returnert til USA som planlagt.

– Me har fått ei bekymringsmelding frå den amerikanske ambassaden i Oslo. Mannen, som er fødd i 1960 og er ca. 180 cm høg, har ikkje returnert slik planen var. Leigebilen han hadde er funnen i Rosendal, og det er naturleg å starta å leita der den står, seier lensmann Jan L. Fosse.

Politiet ynskjer tips, og det er observasjonar gjort i dagane 25., 26. og 27. august dei er på jakt etter. Leigebilen skulle vore levert 28. august, og ein har greie på kor han har vore i dagane før 25. august.

– Har nokon treft på han, snakka med han eller sett han, så ta kontakt på 53483800 eller 02800. Han er sagt å vera interessert i lokalhistorie og å snakka med folk, men han kunne ikkje norsk, opplyser Fosse.

Mannen hadde gråbrunt hår og blå auge. Han kan ha hatt andre klede på seg enn dei han har på biletet.