Håper å opna alpinbakken neste helg

Håvard Sætrevik

Håvard Sætrevik

haavard@grenda.no

Publisert: 11. januar 2021, 16:30

Fjellhaugen Skisenter har med glede tatt i mot snøen som fall i helga. No nærmar det seg full fart på alle frontar i skisenteret.

Som Grenda skreiv i desember, har Fjellhaugen Skisenter hatt ei omfattande oppgradering av skitrekket, som følgje av nye krav til taubanar frå EU si side. Vedlikehaldet, som er gjort på dugnad, er snart i mål.

– Planen er å sluttføra vedlikehaldet og så gå rett vidare til klargjering av bakke og trekk. Er vêret med oss med nedbør og snø, så planlegg me med opning 22. januar, seier driftsleiar i Fjellhaugen Skisenter Øystein Svendsen.

 

Løype til Nautavatn

– Lysløypa er køyrt opp. Ho er ikkje perfekt, men definitivt god. Me har byrja å preparera i skitrekket. Førebels er koronarestriksjonane ei avgrensing fram til 18. januar i første omgang, så det hastar ikkje å gjera alt ferdig. Me satsar på oppmjuking frå staten frå neste veke av, og i så fall siktar me oss inn mot oppstart 22. januar, seier Svendsen.

I tillegg til at lysløypa er preparert, er det køyrt opp spor til Nautavatnet.

– Søndag var det fullt av skigåarar som skulle inn dit. Den nedste av parkeringsplassane var full, seier Svendsen.

Dei jobbar no på for å koma i mål med førebuingane.

– Forhåpentlegvis kan me få ein sesong der me får halda ope. Det vil bety mykje for dei som ynskjer å stå på ski, og det betyr mykje for skisenteret som treng inntekter, sluttar Svendsen.