Håpar å ha vaksinert alle vaksne innbyggjarar før sommaren

Kommuneoverlege Glenn André Opland freistar med ein tilnærma normal sommar om folk er flinke å følgja smittevernet og om vaksineringa går som planlagt.

I ein video som er delt på kommunen sine Facebook-sider, kjem kommuneoverlege Glenn André Opland med ei orientering om koronavaksine og karantene til innbyggjarane i Kvinnherad. Her fortel han blant anna at kommunen håpar å ha kome langt med vaksineringa før sommaren.

– Ikkje uventa har vi hatt ein del smitte på nyåret. Dette synest no å ha roa seg, og vi kryssar fingrane for at det held seg slik fram til vi får vaksinert alle våre vaksne innbyggjarar, forhåpentlegvis før sommaren, seier Opland.

Kommunen er allereie godt i gang med vaksineringa, og har no vaksinert alle bebuarar med langtidsplass på ein av kommunen sine institusjonar.

– Vi har også starta vaksineringa av prioritert helsepersonell. Leveranse med vaksinedosar vil auka i vekene som kjem, og vi håpar snart å koma i gang med massevaksinasjonen, seier kommuneoverlegen.

 

Freistar med normal sommar

Som kjent er det innbyggjarane over 85 år som då er først i køen, før ein held fram med dei mellom 75 og 85 år. Etter det kjem dei som er i aldersgruppa 65 til 75 og dei mellom 18 og 64 år som er i risikogruppa.

– Alle vaksne over 65 år vil bli kontakta av kommunen for å avtala tid og stad for vaksinering. Det same gjeld truleg òg risikopasientar under 65 år. Alle vaksne under 65 år vil få nærare informasjon, seier Opland og bed innbyggjarane følgja med på kommunen sin nettstad og i lokalavisene for laupande informasjon.

Avslutningsvis peikar han på viktigheita av å følgja dei gjeldande smittevernreglane til kvar ei tid og at dei som kjem til landet frå eit raudt land følgjer karantenereglane.

– Det er lys i enden av tunnelen, og kanskje kan vi – om vaksineringa går som planlagt og vi er flinke med smittevernet – få feira ein tilnærma normal sommar, seier Opland.