Handeland Industri kjøper halvparten av BKS-konsernet

Skarvelandfamilien har gjennom sitt industriselskap, Handeland Industri AS, kjøpt 50 prosent av aksjane i BKS-konsernet.

Det kjem fram i ei pressemelding frå Handeland Industri AS og BKS tysdag. Der står det òg at BKS-konsernet har hatt ei svært positiv utvikling med Tore Thorkildsen og Gudmund Øvrehus som eigarar, og konsernet har høg aktivitet innan kraftkrevjande industri, maritim sektor, akvakultur og olje og gass.

– For å styrka og vidareutvikla BKS-konsernet som totalleverandør for eksisterande og nye kundar, er det vedteke å fusjonera BKS Montering AS og BKS Service inn i BKS Industri AS innan utgangen av 2019, står det å lesa i pressemeldinga.

BKS-konsernet, som har hovudkontor på Sunde, vil etter fusjonen bestå av selskapa BKS Holding, BKS Industri, BKS Eigedom og er majoritetseigar i BKS VVS og Ventilason og Zenit Engineering.

– Til saman har konsernet 256 tilsette og ein forventa omsetnad på 236 millionar kroner i 2019, skriv dei i pressemeldinga.

Tore Thorkildsen held fram som dagleg leiar i BKS Industri og Trygve Kjerpeseth blir ny styreleiar.