Han har teke over Festidalen-campen

Johan Nerøy frå Stavanger har saman med kompisen, Eirik Kvindesland, tatt over ansvaret for campen på Festidalen.

Til vanleg bur og studerer Johan i England, men om somrane likar han å opphalda seg i Kvinnherad. Han har tidlegare hatt sommarjobb på Baroniet, i fleire sesongar.

– Eg kom i snakk med Margit Lund-Mikkelson, og det enda med at eg tok over campansvaret i fjor, fortel Johan.

 

Snart i mål

– Eg er nesten ferdig med alt det nødvendige. Berre litt pynting og nokre sitjegrupper att, smiler Johan.

Han har putla på åleine nede på området sidan før helga, kompis Eirik kjem først fredag morgon.

– Det er ein utruleg kjekk jobb, og det er veldig lite trøbbel med gjestene. Det brukar å vera opp mot 100 stykk som søv her, samt fleire som kjem for å henga, fortel Johan.

 

Treng folk til laurdagen

– Det er veldig triveleg og sosialt å jobba som frivillig her på campen. Ein jobbar på eige driv og får litt ansvar. Det er ikkje noko stressande jobb, og no er det heldigvis meldt bra vêr, så det blir nok skikkeleg godstemning. Campstemninga gir ein komplett pakke under festivalen, smiler Johan.

I tillegg til alle dei blide gjestene som brukar å koma på Festidalen kan campsjefen lova kaffi og vaflar til dei frivillige òg.

– Dette blir bra, eg gler meg, sluttar Johan.