Haakon leverte kanontid på Husnes Stadion

Marius Tveit Nissestad

Marius Tveit Nissestad

marius@grenda.no

Publisert: 10. september 2020, 12:00

Haakon Skjelnes sprang inn til den tredje beste tida på Norges Friidrettsforbund sin årsstatistikk på 5000 meter onsdag ettermiddag.

15-åringen, som byrja å springa for eitt år sidan, stod for dagens prestasjon på Trio sitt friidrettsstemne onsdag då han klokka i mål etter 5000 meter på tida 16,40,5.

Ei tid som betyr at berre to 15-åringar har sprunge ein raskare 5000 meter enn han i 2020.

– Det såg lenge ut til at ungguten frå Rosendal måtte gjera det mutter åleine, men Ronny Nordal stilte velviljug opp som hare. Dei la ut på eit skjema med 80sekundarsrundar, og Haakon avslutta med ein sterk sisterunde på 71 sekund, skriv IL Trio på sine heimesider.

 

Støyta seg til ny rekord

Ådne Bertin Stuland Olsen (Arkivfoto)

Men han var ikkje den einaste som leverte på Husnes stadion denne ettermiddagen. For på det som var det Trio-stemnet med flest deltakarar på mange år, imponerte også Ådne Stuland Olsen frå Omvikdalen.

Kastutøvaren nærmar seg stadig 12-metersgrensa i kuleringen, onsdag sette han ny personleg rekord med 11,89 meter i kulestøyt.

– 12-metersgrensa skjelver i frykt, skriv IL Trio.

Heile 36 deltakarar deltok på stemnet, der 33 av desse var i barneklassane.

– Det er eit resultat av at vi i friidrettsgruppa no i haust har fått i gang treningsgrupper for både 1.-2. klasse, 3.-4. klasse og 5.-7. klasse. Her er det mange ivrige, nye utøvarar og det borgar for auka aktivitet på friidrettsfronten. Det er kjekt å sjå så mange spente små i sitt første stemne, og kjekt å sjå framgang hos dei som har vore med ei stund, skriv friidrettsgruppa til Trio.