Gull til Uskedalen!

OPPDATERT MED SIGERSINTERVJU OG MANGE BILETE: Uskedalsjentene var suverene i finalen, og utklassa motstandaren 4-1.

Morten Nygård

Morten Nygård

morten@grenda.no

Publisert: 3. august 2018, 14:32

Laga frå Kvinnherad har gjort det svært bra i Norway Cup dei siste to åra. I fjor fekk vi tre bronsemedaljar i A-sluttspelet. Både Halsnøy G14, Halsnøy J15/16 og Rosendal/Uskedal G15/16 klarte den bragda. I tillegg fekk Rosendal J13 delt gullmedalje i B-sluttspelet.

Jenter 14 år frå Uskedalen kunne ikkje vera noko dårlegare i år. I finalen i B-sluttspelet tok Uskedalen leiinga allereie etter tre minuttar ved Emma Myklebust Ripel. Berre fire minuttar seinare auka same jente med eit skot i krysset. Emma var verkeleg ustoppeleg, og sytte for endå eit mål og 3-0. Mot slutten av fyrste omgang sendte Ruth Marie Myklebust av garde eit langskot, dermed stod det 4-0 ved halvtid.

Sjølv om Skodje reduserte éin gong i 2. omgang, var Uskedalen aldri truga. Tvert om, dei hadde sjansar nok til å scora opptil fleire mål. Etter kampslutt kunne Saima Kristine Lomheim Døssland løfta pokalen.

 

Gode heile tida

– Dette var heilt fantastisk. Jentene var veldig flinke i dag, utruleg flinke, jublar trenar Gørill Samland Eik på telefonen frå Ekebergsletta.

Sjølv om det vart storsiger i finalen, er ikkje trenaren sikker på om det nødvendigvis var deira beste kamp i turneringa.

– Eg synest dei har vore veldig gode heile tida, ikkje minst i dei to kampane i går (kvart- og semifinalen). I dag fekk vi overtaket heilt frå starten av, og hadde deretter bra kontroll. Alle utførte oppgåvene sine til punkt og prikke, og då funkar det. Når spelet vårt sit, då er det ikkje mange som slår oss, seier Gørill, som takkar alle for ein kjempeinnsats.

– Det som er kjekt med laget vårt er at det er ingen som stikk seg ut. Alle er veldig jamne, og det trur eg er styrken vår, legg ho til.

 

Feirar seinare

Sidan jentene grunna ferien ikkje kjem samla heim til Uskedalen, vert det ikkje noko markering no, truleg heller kring skulestart.

– Vi må i alle fall få til ei skikkeleg feiring, smiler Gørill Samland Eik.

Dette er gullvinnarane: Anna Elisabeth Samland Eik, Celine Musland, Emma Myklebust Ripel, Emma Måkestad Smith, Helene Myklebust, Ruth Maria Myklebust, Saima Kristine Lomheim Døssland, Selma Ovidia Guddal Tarberg og Åsne Hjelmeland Arnesen. Trenarar er Roar Musland og Gørill Samland Eik.

Uskedal jenter 14 år jublar for gullmedaljar på Ekebergsletta i dag. Glade er også trenarane Roar Musland og Gørill Samland Eik. (Alle foto: Espen Eik).

Trio G14 Raud tapte diverre sin finale i B-sluttspelet. Der vann Eikelandsfjorden 2-1. Men sølv er uansett svært bra!