Grenda startar «tv-selskap»

Morten Nygård

Morten Nygård

morten@grenda.no

Publisert: 8. november 2018, 09:25

På Grenda si nettside har du dei siste helgane kunne sjå ulike filminnslag samla under vignetten «Vekeglimt», produsert av «selskapet» Grenda-TV. Sendingane har blitt godt motteke, og vert vonleg ein fast programpost.

Dei fire siste helgane har Grenda-TV samla videoklipp frå veka som gjekk i ei sending med tittelen «Vekeglimt». Der har sjåarane kunne følgja med på alt frå nyhende og politikk til kultur, skuleliv, dugnader og sport. Sjølv om vi ikkje har kunna konkurrera med gullrekka til NRK, har tilbakemeldingane vore så gode at Grenda vil halda fram med denne programposten.

Frametter vert truleg søndag ettermiddag fast tidspunkt for lansering av vekas episode.

– Vi har den tekniske moglegheita til å formidla levande bilete og lyd, og det er ei mogelegheit vi har utnytta i liten grad til no. Framleis er det slik at tekst og bilete på papir er faget vårt, men vi trur desse glimta kan vera ein kjekk måte å formidla nokre av alle tinga vi er ute og dekker. Gjerne med ein annan vri enn den vi til vanleg serverer lesarane våre, seier redaktør Håvard Sætrevik.

 

Ny episode

Episoden som vert gjort offentleg komande søndag vil mellom anna visa innslag frå 25-årsjubileet til Galleri G Guddal, sonesamlinga for lokale fotballspelarar i Rosendal, Strand-Ulv-jentene sin seriekamp på Husnes, bogeskyttarkonkurransen på Sunde, den avsluttande skyteskulen på Seim og miljøaksjonen til Omvikdalen skule.