Gjentek suksessen frå i fjor
Også i år inviterer Turstiar på Sunde til motbakkeløpet Kaldestadåsen Opp.
Søndag er det klart for den andre utgåva av det kombinerte motbakkeløpet og familiedagen Kaldestadåsen opp.
Artikkelen held fram under annonsen.
– Dette er noko vi trur har potensialet til å bli ein tradisjon. I alle fall turdelen av det, vi er meir usikker på konkurransedelen. Men det er noko nytt, så vi håpar og trur at det er noko folk vil vera med på, seier Bjørn Heimvik frå Turstiar på Sunde.
I år som i fjor startar løpet på grusbanen i Husnes idrettspark og går vidare inn på den mest brukte løypa opp til Kaldestadåsen. Ein går forbi trappene i Stegabrekko, før ein rundar mot toppunktet som ligg 271 meter over havet.
– Og om vi får i gang maskinane der oppe i løpet av denne veka, så kan det òg vera at deltakarane får jogga på litt ny grus på vegen opp, seier Heimvik.
Kaldestadåsen Opp er i fyrste omgang eit treårig prosjekt som skal evaluerast etter 2019-konkurransen.
– Og då finn vi kanskje ut at vi vil flytta starten til Sunde skule eller Podlen, sånn at vi får brukt dei andre traseane opp til åsen også. Men det er noko vi må sjå på, seier Heimvik.
På toppen ventar premiar til konkurransedeltakarane, tilfeldig loddtrekning på startnummer på turklassen og sjølvsagt noko å bita i frå turkafeen.