Gjenopnar barnehagar 20. april og småskulen 27. april

Regjeringa har bestemt seg for å opna barnehagar 20. april, medan dei frå 27. april vil gjenopna skulen for 1.-4. trinn, SFO og vidaregåande elevar som skal ut i lære neste skuleår.

26 dagar har gått sidan regjeringa innførte dei strengaste tiltaka som er innført i Norge i fredstid. No har dei bestemt seg for å gjera sju endringar i tiltaka.

Det kunne statsminister Erna Solberg fortelja på ein pressekonferanse i marmorsalen i klima- og miljødepartementet tysdag.

 

Dei yngste elevane først

Frå 20. april vil alle landets barnehagar opna opp igjen, og frå 27. april vil elevane i 1. til 4. trinn igjen kunna gå tilbake på skule og SFO. I tillegg opnar den vidaregåande skulen igjen for elevar som skal ut i lære neste år.

- Alle endringane har ein føresetnad; at vi skal ha gode reglar for smittevern på plass. Det er viktig at lærarar, elevar og foreldre er trygge på det som skal skje når vi no opnar, difor er det viktig at alle får tid til å førebu seg skikkeleg på ei opning. Ved å opna barnehagar 20. april og skulen for elevar i 1. til 4. trinn så gir vi skular og barnehagar god tid til å opna igjen, sa Erna Solberg og la til:

- Vår ambisjon er at alle elevar, på eit eller anna vis, skal få koma tilbake på skulen før sommaren.

 

Opphevar hytteforbodet

I tillegg opnar regjeringa no for studentar som er på slutten av studiet og som er avhengig av å vera på universitetet for å fullføra studiane sine.

Det skal òg lagast ein bransjestandard for smittevern slik at helsefaglege verksemder utanfor spesialhelsetenesta, som for eksempel psykologar, fysioterapeutar og kiropraktorar kan halda opent frå tidlegast 20. april. Ein tilsvarande bransjestandard skal òg lagast for andre verksemder med éin til éin kontakt, som for eksempel frisørar, hudpleie og massasje, slik at dei kan halda opent frå seinast 27. april.

I tillegg til det opphevar regjeringa hytteforbodet 20. april.

 

Ikkje bli uforsiktige

Men sjølv om regjeringa mjukar opp i tiltaka i veka etter påske, var statsministeren klar på at vi ikkje kan seinka skuldrane.

- Det har gått 26 dagar sidan vi endra måten vi lev liva våre på. Ei tid vi har forlanga mykje frå kvar enkelt. Vi ser at smitteverntiltaka fungerer. Vi opnar no litt opp, men eg vil understreka sterkt at vi ikkje kan bli meir uforsiktige av den grunn. Andre tiltak og råd gjeld framleis. Vi må visa seigleik i det lange løp og halda fram med det vi veit verkar, men no med enkelte endringar. Endringar vi skal gjera saman, kontrollert og over tid, seier Solberg.

Ho og helseminister Bent Høie la vekt på at det framleis er viktig at folk held avstand, følgjer karantenereglar, har god hand- og hostehygiene og held seg heime om dei har symptom.

- Byrjar vi å bli uforsiktige i kvardagen kan smitten koma ut av kontroll, sa Solberg.

- Når vi lukkast med å kontrollera smitten kan vi opna meir opp. Ser vi at vi mislukkast så må vi stramma inn igjen, sa helseminister Bent Høie.