Går på med Pink Floyd 2

Marius Tveit Nissestad

Marius Tveit Nissestad

marius@grenda.no

Publisert: 29. desember 2018, 09:01

Gaa Paa-gjengen sitt ynskjer om å gje Kvinnherad-publikummet meir Pink Floyd vart for sterkt. Difor kjem no Pink Floyd prosjekt 2.

– Me fekk kolossalt mange gode tilbakemeldingar etter konserten i februar i år. Det som var ekstra gøy var at rosen var så forskjelleg. Pink Floyd-musikken har hatt ulike epokar og ulike uttrykk, frå midten på 60-talet og fram til vår tid. Ergo kan to Pink Floyd-fans ha totalt ulike preferansar – og eg har inntrykk at me trefte svært mange av dei sist februar, seier Oddbjørn Kloster frå Gaa Paa i ei pressemelding.

Difor har han og resten av Gaa Paa-familien gleda av å invitera til konsertar i Kulturhuset Husnes 15. og 16. februar neste år. Det nøyaktig eit år etter første konsert.

– Me prøver å gjera omtrent det som eg trur Pink Floyd ville gjort om dei vitja Husnes to år på rad – me lagar eit heilt nytt show. Me vil at publikum skal komma på konsert og ikkje vita kva som dukkar opp rundt neste sving, seier Kloster.

Men sjølv om showet er nytt, med mykje ny musikk og ny dramaturgi, vil «monsterlåtane» frå fyrste konsert sjølvsagt bli med over i prosjekt nummer to.

– Også teknisk produksjon og scenografi blir fornya til dei nye konsertane. Me har ein klar visjon om å ikkje gjenta ein suksess, men å forsøka å laga ein ny, seier Oddbjørn.

Pink Floyd-prosjektet er eit prosjekt i to delar, difor kjen det ikkje noko del tre.

– Difor vil eg minna om at over hundre håpefulle ikkje fekk billett til førre show, og at ein må vera tidleg om seg. Og som sist ynskjer me, saman med Kulturhuset Husnes og våre støttespelarar, å gjera denne helga i februar til ei skikkeleg kulturhelg der det bli tilbod også utover desse to gigantkonsertane, sluttar Oddbjørn.