– Frivilligheita bidrar med 6,9 milliardar kroner i Kvinnherad årleg

Offentleggjering av  vedtaket med ei femdobling av leigeprisen for skular og kommunale bygg til frivillige lag og organisasjonar, skapte forståeleg nok mykje støy i dei frivillige organisasjonane. I etterkant har Kvinnherad kommune gjort retrett m.a. ved at Levekårskomiteen måndag 4. juni gjekk inn for at overnatting på skular skal vera gratis for born og unge under 19 år i regi av frivillige lag og organisasjonar.

Dette er eit klokt vedtak av levekårskomiteen som kommunestyret, når saka skal handsamast 21. juni, fullt ut bør slutta seg til, og såleis oppheva det famøse vedtaket som skapte unødig rabalder!

Kva som skuldast at «prisauken» vart vedteken av kommunestyret i 2017, er vanskeleg å forstå anna enn at politikarane truleg ikkje veit eller har kunnskap om kva verdiar og betydning frivilligheita bidrar til i Kvinnherad kommune. På bakgrunn av støyen rundt denne saka var det difor underleg at ingen politikarar, med unntak av ordførar Peder Sjo Slettebø, hadde teke seg bryet med å delta på kommunen sitt eige oppstartmøte og konferanse for å få laga ein «Kommunal frivillighetsplan» som vart arrangert i Husnes kulturhus nyleg. Hadde politikarane møtt, til liks med dei 53 deltakarar frå over 29 ulike lag og organisasjonane som møtte der, så ville dei fått mykje nyttig informasjon med seg til hjelp og ballast når saker om frivilligheita skal politisk handsamast.

For kor stor årleg verdiskapning står eigentleg dei over 700 frivillige lag og organisasjonane i Kvinnherad kommune for?

I fylgje politisk seniorrådgivar Bjørn Lindstad i Frivillighet Norge, så bidreg frivilligheita i Norge med ei årleg verdiskapning på 125 milliardar kroner skapt av 148.000 frivillige (tal frå Statistisk Sentralbyrå/Frivillighet Norge).

Lindstad opplyste at dei hadde rekna seg fram til at det er 8100 frivillige i Kvinnherad.

Ut frå desse faktatala, bidreg såleis frivilligheita i Kvinnherad med ei årleg verdiskapning på heile 6,9 milliardar kroner.

Dette er eit svimlande høgt beløp og om vi eksempelvis tenkjer oss verdiskapinga utbetalt som løn til alle innbyggjarane i kommunen (13.241 i 2017/ssb-tal), så ville det utgjort kr 521.109,- pr. innbyggjar årleg.

Men dette er ikkje løn. Dette er verdiar som blir skapt av frivillige eldsjeler utan tanke for eiga vinning. Einaste ynsket deira er å gje innbyggjarar og tilflyttarar eit breiast og best muleg aktivitetstilbod i heile kommunen.

Dei frivillige organisasjonane har elles stor betydning som nærmiljøbyggjarar og som bidragsytarar for å skapa eit godt lokalsamfunn og ein god kommune. Dei sparer m.a. kommunen vår for store kostnadar i form av aktivitetar, sosialisering, integrering, m.m.

Dette bør vektleggjast sterkt når saka om leigeprisar kjem opp i kommunestyret for ny handsaming, og eg oppmodar politikarane om å leggja til rette for og hjelpa frivilligheita ved å vedta gratis eller rimelegast muleg leige for skular og kommunale bygg til frivillige lag og organisasjonar!

 

Lesarbrev frå Jostein Hatteberg, leiar i Rosendal Turnlag

 

[gravityform id="11" title="true" description="true"]