Friluftsgudsteneste i Holmedal

Freelands Grenda

Grenda

post@grenda.no

Publisert: 12. juli 2019, 08:05

I fleire år har Utåker bygdalag og soknerådet saman arrangert «Gamaldags kyrkjesundag» på den gamle kyrkjestaden i Holmedal. Søndag 14. juli inviterer vi nok ein gong til gudsteneste ute på den idylliske plassen, med stor historisk verdi.

Vi håpar at flest mogeleg kler seg i gamle klede, eller gamalmodig klesdrakt, denne dagen, og på den måten er med på å lage ei gamaldags, fin ramme rundt gudstenesta. Alle er sjølvsagt likevel velkomne «som dei er».

Holmedal gamle kyrkjegard ligg vakkert til i Kyrkjedalen i Holmedal på Utåker med panoramautsikt over Skåneviksfjorden. I Hordaland reknar vi med at det vart bygd ca. 60 stavkyrkjer fram mot 1300-talet. Fyrste stavkyrkja vi kjenner i Holmedal er nemnd i ei jordbok på 1300-talet. Denne er det laga ein modell av. Denne kyrkja vart ståande i fleire hundre år,  til 1814 då ei enkel langkyrkje av lafta tømmer, utan tårn, vart bygd. Nyttårsdag i 1882 møtte folk til den siste gudstenesta i denne kyrkja. Det som kunne brukast av materialar frå kyrkja i Holmedal vart no flytta og brukt til oppføring av noverande Holmedal kyrkje. Denne kyrkja vart vigsla den 22. november 1882.

Etter gudstenesta vert det matøkt med medbrakt niste, og det vert høve til å ta ein kikk på informasjonstavla som i fjor sommar vart oppført like ved den gamle kyrkjestaden.

Vel møtt til friluftsgudsteneste på historisk grunn. Dersom det skulle verta svært dårleg vêr, vert gudstenesta flytta til kyrkja.

 

Tekst: Reidar Ådnanes, sokneprest Husnes og Holmedal