Fredagskonsertar på turisthotellet

Kvar fredag gjennom heile sommaren blir det konsertar i kjellaren til Rosendal Turisthotell.

– Prosjektet byrja i fjor. Spanske Lucia Molina, som er servitør her på turisthotellet, er ein framifrå vokalist. Me hadde fleire konsertar i fjor, og ynskjer å gjenta det i år, fortel Stig Klette.

Fredag hadde han konsert saman med Vivi-Ann Brede (vokal), Roger Sjøvoll Dalland (gitar) og Jose Zaragosa (trompet).

Sistnemnde er, som Molina, frå Spania, og er eit nytt tilskot til den lokale musikarfaunaen som blir å høyra i kjellarlokalet.

– Me har tenkt å ha konsert kvar fredag, litt tidleg på kvelden. Det er slik at me ynskjer eit publikum som ikkje er komne så langt at dei snakkar høgt, men heller er her og lyttar til musikken, seier Klette.

Han fortel at dei alt er i gang med fredagskonsertane, og har allereie eit knippe konsertar bak seg.

– Me spelar lågt og akustisk, som går an når publikum lyttar meir enn dei snakkar. At me har utanlandske musikarar og lokale krefter om ein annan, gir ein kjekk miks. Og så er det nye samansetjingar frå gong til gong, reklamerer gitaristen.