Kjetil Mehl skal saman med broren Vidar sykla så langt som mogeleg på 24 timar. Målet med galskapen er å samla inn pengar til kreftforeininga og slagforeininga, og stuntet startar torsdag kl. 12 på friidrettsbana i Rosendal.

Framskunda sykkelstart

Brørne Kjetil og Vidar Mehl har sett på vêrvarslinga og flytta startskotet for 24 timarssyklinga til kl. 12 på torsdag.

24 timar på sykkelsetet er framleis 24 timar, men for Kjetil (36) og Vidar (33) Mehl har det litt betydning om det er opplett eller ikkje. I jakta på flest mogeleg kilometer, er tørrast mogeleg asfalt viktig. Etter grundig konsultasjon med Meteorologisk Institutt har brørne bestemt seg for å framskunda startskotet til Kristi Himmelfartsdag klokka 12. Altså i morgon.

Artikkelen held fram under annonsen.

 

Blir tøft

– Det er lite som tilseier at 24-timars sykling er godt for formen på noko vis, så det er greitt å vita at eg ikkje skal på noko løp på lang tid, seier Vidar.

Kjetil sykla Trondheim - Oslo i fjor, og brukte 18-19 timar på det.

– Det freista ikkje å gå på sykkelen etterpå, men det gjekk overraskande raskt over.

– Det kan bli litt einsformig. Kanskje me må skifta retning mellom pausane. Sjølv om det rullar godt, får du ikkje noko gratis, supplerer Vidar.

– Men me kan dra nytta av kvarandre. Og så må me ha ein plan på når me skal ha pausar, plan for mat og drikke, kommenterer Kjetil.

– Tøffaste perioden trur eg blir i 1-3 på natta, for då er kroppen vant med å gå i dvale. Eg har sykla eit slik 24-timarsritt som stafett for 10 år sidan, og dei etappane du skulle starta på natta, var blytunge, minnest Vidar.

Artikkelen held fram under annonsen.

 

– Vil gjera vondt

Innsamlingsaksjonen er no etablert via bidra.no. I tillegg håper brørne å utfordra bedrifter til å gje gåve til innsamlinga.

– Det er kjekkast viss me får nokon til å lova ein sum pr. kilometer me syklar. Det vil vera sterk motivasjon til å strekkja oss lengt mogeleg, seier Kjetil.

– 50-100.000 kroner ser eg ikkje som urealistisk, seier Vidar optimistisk.

Grenda planlegg å følgja karane tett i løpet av dei 24 timane dei skal sykla. Både distansen og det innsamla beløpet blir fortløpande oppdatert på nettsida vår frå startskotet går.

– Det kjem til å gjera vondt, men det går til to gode saker, sluttar brørne.

 

Artikkelen held fram under annonsen.

Onsdag klokka 15.00 var det kome inn 9240 kroner. Her kan du følgja korleis innsamlinga går.