Frå 470 til 7 takstsoner i Hordaland
Fylkestinget i Hordaland har vedteke å redusera talet på takstsoner for kollektivtrafikken i Hordaland frå 470 til 7. Dette skjer frå onsdag 1. august.
Målet er å gjera det lettare å reisa kollektivt i fylket. Pendlar- og passasjerstraumar, skulekrinsar, kommunegrenser, tettstader, knutepunkt og naturlege grenser sett av fjord og fjell har vore førande i arbeidet med å utarbeida den nye sonestrukturen. Likevel vil dei nye sonegrensene nokre stader kryssa kommunegrenser eller buss- og vegsamband. Det skal også bli enklare å kjøpa billett.
Artikkelen held fram under annonsen.
Frå og med 1. august kan appen «Skyss Billett» nyttast i heile fylket. Ein enkeltbillett vil vera gyldig i 90 minutt innanfor ei sone, og i 30 minutt ekstra for kvar ekstra sone du betalar for. Innanfor kvar sone blir det éin pris i heile sona. Om du skal krysse ei sonegrense, blir billetten dyrare etter kor mange grenser du kryssar. Makspris for enkeltbillett blir fire soner, og tre for periodebillettane.