Forfattarsamling på Turisthotellet

Ingebjørg Eik

Ingebjørg Eik

ingebjorg@grenda.no

Publisert: 7. desember 2018, 14:00

Laurdag 8.desember kjem Lene Mehl, Veronika Erstad og Anders Totland til Rosendal Turisthotell for å snakka om barnebøkene sine.

Lene Mehl debuterer med barneboka Noa har en hemmelighet, medan Totland kjem for å snakka om den fyrste boka han kom ut med i år, Den norske slavehandelen. Erstad skal presentera Korleis bli kvitt ei veslesøster.

– Dette er eit gratis familiearrangement og det er utruleg kjekt at det er heile tre kvinnheringar som er aktuelle med barne- og ungdomsbøker samstundes, seier Bente Soldal som står bak forfattarsamlinga.
– Eg er imponert over Lene sin debut. Eit viktig tema om å akseptera kvarandre som ein er, seier Bente.

Dette er Lene sin fyrste offisielle presentasjon som bokdebutant, og ho er veldig glad for å få vera med på samling saman med to etablerte forfattarar.

– Vi kjem til å lesa litt frå bøkene og svara på eventuelle spørsmål, seier Lene på telefon frå austlandet.

Anders er aktuell med ungdomsromanen Nedteljing, men det er barneboka Den norske slavehandelen han kjem for å snakka om.

– Eg reknar med eg kjem til å bidra med hakket meir brutalitet enn dei to andre forfattarane, seier Totland.

Veronika har òg gitt ut to bøker i år og ho gler seg til å koma heim og delta på samlinga.