Fonnatur i fare etter klage

Det er likevel ikkje sikkert at det blir noko av turen for funksjonshemma til Folgefonna i vår. Fylkesmannen har nemleg klaga på løyvet til å nytta helikopter og snøskuter. – Skammeleg og meiningslaust, seier styremedlem i nasjonalparkstyret.

Torsdag i førre veke skreiv Grenda at det skal arrangerast tur for funksjonshemma til Folgefonna i vår. Dette i regi av DNT Odda/Ullensvang. Men så enkelt var det ikkje, viser det seg. Etter at Folgefonna nasjonalparkstyre sa ja til søknaden på førre møte, har fylkesmannen sendt klage på vedtaket. I klagen vert det vist til at det korkje i verneforskrifta eller i forvaltningsplanen er gitt noko særskilt opning for motorferdsle i samband med transport av rørslehemma.

 

Risiko for presedens

– I nasjonalparkar og område verna etter naturmangfaldlova er restriksjonane normalt særleg strenge. Det betyr at terskelen for å få løyve til motorferdsel her skal liggja høgare enn elles, heiter det i klagen.

I vedtaket til nasjonalparkstyret går det fram at dei ser risikoen for presedens som liten. Samla belastning på verneverdiane vert heller ikkje vurdert som stor. Fylkesmannen er usamd i dette.

– Fylkesmannen legg vekt på at løyve til denne typen motorferdsel med helikopter vil kunne skape ein presedens som kan gje forstyrring og uro som er i strid med verneformålet. Funksjonshemming eller andre tilhøve som avgrensar høva for ferdsle til fots, er i seg sjølv ikkje tilstrekkeleg grunnlag for å gje dispensasjon til motorferdsel etter verneforskrifta, skriv han.

 

Stillheit og ro

Fylkesmannen konkluderer med at eit løyve til bruk av helikopter og snøskuter er i strid med verneformålet, og vil verka inn på vesentlege verneinteresser.

– Helikopterstøy har stor styrke og vil vera særleg forstyrrande i nasjonalparken, kor mellom anna friluftsliv er ein viktig aktivitet. Å oppleve stillheit og ro er blant dei viktigaste årsakene til at folk oppsøkjer området, går på tur eller driv andre former for enkelt friluftsliv, står det i klagen.

Nasjonalparkforvaltaren er samd med fylkesmannen, men Folgefonna nasjonalparkstyre vil ikkje ta klagen til følgje. Det gjorde dei samrøystes vedtak om i eit møte måndag ettermiddag på Folgefonnsenteret i Rosendal. Saka går dermed til Miljødirektoratet for endeleg avgjerd.

 

– Skammeleg 

– Det er skammeleg og meiningslaust at dei har protestert på dette. Eg har nesten ikkje ord, seier styremedlem Leif Sverre Enes til Grenda.

Han fortel at deltakarane på måndagens styremøte var veldig overraska over den siste utviklinga i saka.

– Folk rista på hovudet over klagen. Dei trudde nesten ikkje kva dei såg, seier han.

At fylkesmannen viser til støyproblem i sitt brev, skjønar han lite av.

– Det verkar som at dei er redd støyen skal bli hengande igjen i fjellet. Men eg er sikker på at eventuelle turfolk som står på bakken og høyrer på når helikopteret kjem, vil applaudera når dei får vita at det er rørslehemma om bord. Dessutan er det berre snakk om éin dag, seier Enes.

 

Dei sprekaste

Han kunne forstått innstillinga om det var totalforbod mot helikopter i nasjonalparken, men slik er det ikkje.

– Ein kan søkja om løyve til å frakta proviant til Fonnabu, noko som kjem dei aller sprekaste til nytte, altså folk som strengt kunne ha bore med seg nista si sjølve. I tillegg får ein nytta helikopter til å fyka inn slikkesteinar til sauene eller henta ut hjortekjøt. Men tiltak for dei svakaste gruppene skal ein altså ikkje få lov til. Eg veit ikkje om eg er mest sint, eller meir skuffa og lei meg på vegner av dei som berre éin gong i livet skulle få oppleva Folgefonna. Eg tykkjer dette er djupt urettferdig, kommenterer Leif Sverre Enes.

Presedensargumentet ser han heller ikkje grunnlaget for, og viser til at det er ganske dyrt å leiga helikopter.

– Og skulle det bli eit problem, så er det berre å stoppa trafikken, slår han fast.