Folkevandring til Kjeldestøl

Det kom langt fleire besøkande til den opne stølen på Kjeldestøl enn det arrangørane hadde rekna med. Såleis var det utseld for mjølkekaker, vaflar og lefser allereie klokka 12.30.

Kjeldestøl venelag reknar med at kring 300 tok turen til den opne stølen på langfredag. Med blå himmel og nysnø på fjelltoppane rundt, var det litt av eit panorama dei frammøte kunne nyta. Folk kom frå både nær og fjern, mellom anna frå den temmeleg fullstappa bubilparkeringa i Rosendal.

På Kjeldestøl kunne dei handla hjå budeiene, studera dei fem restaurerte sela, eller berre slappa av i vårsola.