Flyttar OmStock til november – har fire band klare

OmStock inviterer til festival i Festsalen på Husnes 6. til 8. november.

- Vi har ikkje lyst til å hoppa over eit år og har skikkeleg lyst til å få til noko i 2020. Difor prøver vi no å få til ein festival i byrjinga av november, seier Trond Betten.

OmStock skulle etter planen ha gått av stabelen i juni, men vart så flytta til byrjinga av august som eit forsøkt på å bøta på koronapandemien. Men etter at regjeringa sette foten ned for større kulturarrangement med over 500 i publikum fram til 1. september, måtte også OmStock tenkja nytt.

Måndag kveld vart det klart at dei flyttar festivalen inn i Festsalen i Kulturhuset Husnes og gjer årets utgåve til ein vinterversjon helga 6. til 8. november.

- Vi har så lyst å vera sosiale igjen, det er noko veldig mange av oss saknar. Då er det lenge å venta heilt til sommaren, så vi tenker at det blir bra med eit slikt arrangement på den tida av året, seier Betten.

Return

Dei jobbar no med å få spikra plakaten, men kan allereie no røpa dei fire første banda til festivalen i november. Dei fire er Return, Queen Tribute Live, Revolt og Michelle Ullestad.

- Det er vi veldig fornøgd med og ein veldig fin start. Så kjem det fleire band etter kvart. Eg har tru på at dette skal bli bra, sluttar Betten.